انتا لسه نايم
(اربعة اشخاص ولدين وبنتين وكل واحد منهم معاه بطاريه منوره على وجهه بالتبادل)
رأفت : هاتبداء انت ولا ابداء انا؟
سمير : ابداء انت
رأفت : لا انت الأول
سمير : لا لا انت الاول
ريهام : لاانت ولا هو انا اللى هابداء
نرمين : بس انت وهو وهو وهى انا اللى هابداء عشان انا اكبر منكم
رأفت : شششششش انا اللى هابداء
(يقوم رأفت ويتجه للجمهور)
رأفت : كل سنه وانتو طيبين (لازم يرد عليه الجمهور) تمام اوى ..انا اسمى رأفت طالب فى سنة رابعة تجارة عين شمس هوائى بحب نفسى بحب الخطية زى عنية محبط يائس ماعنديش ثقة فى نفسى من الاخر انا لاشىء
نرمين:يا عينى يا ابنى دا انت حالتك صعبة اوى
ريهام:ودة من اية يا اخويا
سمير:حاولت تغير من نفسك
رأفت: حاولت كتير بس فشلت اكتر على الرغم من انى بحب الخطية بس كنت بعد ما اعملها احس بندم واقعد مع نفسى واقول لية يا رافت لية عملت كدة وكنت اسمع اصوات من جوايا تقولى
سمير: انت جبان
نرمين:انت فاشل
ريهام:انت مفيش فايدة فيك
رافت: وكلام اكتر من كده بكتير بيدور فى عقلى وبسمعة بس دة كان فى المرحلة الاولى من حياتى مع الخطية ام المرحلة التانية اقدر اسميها مرحلة الامبالاة يعنى من الاخر اعمل الخطية ومااندمش عليها
ريهام:ماتحكلنا حكايتك يمكن نقدر نساعدك
رافت:اسمعى يا ستى الحكاية انا كل سنة مقضيها بالطول والعرض اعمل اللى انا عايزة والخطية عندى اهم شىء فى حياتى بحب اهتم بيها اوى واعملها انا مستمتع وببقى مش فاضى السنة كلها وطبعا زى ماانتوا عارفين الروح القدس مش مطفية وبس دى اكتر من كدة انا بديها اجازة السنة كلها لكن لما بيجى الصوم الكبير بحس انى لازم اتغير لازم اقف وقفة مع نفسى واحسبها وابقى انا انسان جديد وابتدى احضر فى الكنيسة وانتظم فى البصخة المقدسة لانى فعلا بحب الجو دة صدقونى انا لما بكون واقف فى البصخة بحس انى انسان جديد ولما بقول ثوك تاتى جوم ببقى فى دنيا تانية
(يقف التلاتة بجوارة ويقولون)
الكل:ثوك تاتى جوم ...............وبعد مايعدى اسبوع الالام ........اقولوا انتو بقى اكيد عارفين
سمير:ترجع ريمة لعادتها القديمة
رافت:اللة ينور عليك ويبدا مسلسل التليفونات يبتدى (يرن التليفون)
ريمون:الحتة الشمال يا حبيب قلبى
رافت: ايوة ازيك
ريمون: اية يلا الرخامة دى مالك متغير لية
رافت:لا مافيش عادى
ريمون:قولى بسرعة انت فين
رافت:انا فى بيتنا
ريمون:وانا تحت بيتكوا ماتنزل
رافت:اصلى ماليش مزاج انزل
ريمون:اطلعلك انا
رافت:لا انا اللى هانزلك
ريمون:اوك
(يلتف رافت ويذهب الى ريمون)
ريمون:رافرف حبيبى هارتى
رافت:ازيك يا ريمون
ريمون:مالك ياد انت فى حاجة انت فين بائلك اسبوع غاطس
رافت:مافيش اصلى كنت بروح الكنيسة كل يوم
ريمون:الكنيسة لية سلمتك انت كنت عيان صح واكيد كنت بتكشف فى عيادة الكنيسة صح
رافت:لا يا خفيف انا كنت بحضر البصخة المقدسة
ريمون:دى حاجة غير القداس ولا اية
رافت:لا مابيفرقوش فيها قربان
ريمون:مش قداس يعنى......رافت هو فى اية
رافت: اسبوع الالام وموسم كل سنة وانت طيب
ريمون:ايييية يا عم الكلام الكبير دة بركاتك يا شيخ رافت
رافت:ريمون متهرجش فى المواضيع دى دة كلام ربنا
ريمون:اية يا رافت ربنا هداك ولا اية استنى كدة دا فى حاجة طلعت فى ظهرك دا جناح بركاتك(ويضحك)اية النور اللى حوالين راسك
رافت:كل دة علشان بقول روحت الكنيسة
ريمون: انت بتشتغلنى ولا بتشتغل نفسك
رافت:ايييية الكلام دة
ريمون:انا عايز اقولك ان السكة دة مش بتاعت اللى زينا اصح وفوق كدة
رافت:ومالو اللى زينا
ريمون:رافت انت نسيت نفسك دا انت ابو المزاج كلوا دا احنا دفنينوا سوا يا ريس
رافت:دا كان زمان دلوقتى انا بقيت انسان جديد واتمنى انك تحاول تكون زى
ريمون:هاهاهاها ابقى قابلنى سلام يا عم القديس
رافت: (يتوجة الى الناس)خلصت البصخة وجية العيد ومشى العيد ايوة اعمل اية دلوقتى ايوة انا احسن حاجة اعملها اروح الكنيسة
ريهام: برفو عليك هو دة الكلام
نرمين: ايوة من الصبح بدرى تروح القد اس
ريهام: بس انت بالك مدة ماعقدتش مع بابا ولا ماما
نرمين:روح البيت اقعد معاهم شوية عيب
رافت:ايوة دول وحشونى اوى انا هاروحلهم
ريهام:استنى هنا انت هاتروح البيت من دلوقتى دى الساعة 6 لسة بدرى
نرمين:متعدى على صحابك شوية وبعد كدة روح البيت
رافت: لا صحابى لا دول اصحاب السوق
ريهام:اخس عليك يا رافت اخس مش دول كانوا حبايبك عيب
نرمين:لا مالكش حق يا رافت يا اخى روحلهم وكلمهم شوية عن ربنا يمكن تقدر تغيرهم
رافت:فكرة كويسة انا هاروحلهم وهاكلمهم وانصحهم
نرمين وريهام:ايوة كدة برافو عليك
رافت:وروحت لصحابى ويارتنى ماروحت وحصل اللى كنت خايف منة
الكل:رجعت ريمة لعادتها القديمة
ريهام:انا اسمى ريهام فى تالتة هندسة كل حياتى هى الكمبيوتر والنت وبالذات النت دا انا من كتر قاعدى على النت صحابى سمونى ريهام دوت كوم اجدع واحدة تعمل شات مع اى حد كويس وحش مش مهم المهم انى زهقت من الاشكال والمناظر اللى واحد بيشوفها كل يوم طب دا كفاية منظر الدكتور وهو داخلنا المحاضرة
(يقف واحد ويمثل دورر الدكتور)
الدكتور:المنهج اهو عندكم 14 كتاب تذاكروا تبرشموا برضوا مافيش فايدة ولا هاتفهموا ولا هاتنجحوا وابقى اقبلونى دفعة هم
ريهام: ودى عينة من الاشكال اللى اعرفها وغير الاصحاب اللى انا اعرفها كلهم مايعرفونيش الا عشان مصلحة
نرمين:يا نو نو واحشانى كتير يا حبيب قلبى
ريهام:بت انت ما انا لسة كنت معاكى فى المحاضرة
نرمين: انت بتوحشينى فى كل وقت ماقدرش استغنى عنك ابدا على فكرة تسرحتك النهاردة هايلة ايدك بقى على كشكول المحاضرات
ريهام:اةةةةةةة قولى كدة ماشى ياستى خدى الكشكول اهو
نرمين : (هاتروح لشاب وتديلى الكشكول) اتفضل يا سيدى الكشكول اهو دى غلبتنى وانت عارف انى ولا بطيقها ولا بحب اشوفها
سمير:انا تعبتك معايا اوى يا روحى على فكرة تسريحة شعرك هايلة جدا
نرمين:اوةةةة ميرسى
سمير: (يروح لريمون)خد يا عم الكشكول اهو انا قولتك ان محدش يقدر يجيبوة الا نرمين كلمتين حلوين على غمزتين وبخ الموضوع خلص اي خدمة
ريمون: انا مش عارف انت طايق نفسك ازاى واد رخم انا ولا بطيقة ولا بطيق اشوفة بس المصلحة
ريهام: هما دول صحابى وعلشان كدة هربت من الجو واقعدت على النت اعمل شات بالساعات على امل اطلع بعريس يكون وسيم وجميل وغنى وفى يوم من الايام حصلت حاجة غريبة
(تجلس ريهام ومعها نوت بوك وفى الجانب الاخر يجلس وسيم على الجانب الاخر)
وسيم: العيال صحابى مش عارف اشوفهم ولا اخرج معاهم كل مااكلم حد منهم يقولى مش فاضى اصل انا قاعد بعمل شات على النت يعنى انا ابن البطة السوداء روحت جايب2 كيلو نت من النوع الفخم وقولت لما اشوف اية النت دة انا احط الفوكس فى البوكس وانطلق يا ابو وسيم ايوة انا دلوقتى بعمل بحث على الشات ايوة انا احدد الاول انا عايز اكلم مين النوع:بنت السن:مش مهم من 11الى 90 البلد: مصر كلها بمحافظاتها وانتر انتر يلا دور براحتك ايييييية النحس دة مصر كلها بمحافظاتها مافيهاش بنت على النت اية كلهم ناموا من بدرى طب احاول مرة تانية انتر انتر ايوة ريري بنت بنت اسمها ريرى يا فرج اللة احمدك يارب انا هابعتلها رسالة hi
ريهام: هاى
وسيم:هاااااااااااا ردت ردت اخيرا حد عبرنى انا مش مصدق نفسى دى بتقولى هاى طب ااقولها ايية هاى هاى هاى
ريهام: هو نام على الكى بورد انت اسمك اية
وسيم: يالهوى يالهوى دى بتقولى اسمك اية فينك يا ماما تيجى تشوفى ابنك انا اسمى وسيم جميل لطيف وانت اسمك اية
ريهام : ريهام ممكن توصفلى نفسك
وسيم: اناناناةةةةةةةةة طش جينا فى الكلام اللى يزعل طب اقولها اية اااااة البودى يحتوى(1راس و2رجل و2ايد وكل واحدة تحتوى على 5صوابع )
ريهام: يا صبر ايوب ما انا عارف انى بتكلم مع بنى ادم مش سحلية شكلك اية هيئتك عاملة ازاى
وسيم:اةةةةةةةةة مش تقولى كدة من بدرى دا انتى مخك على قدك وهاتتعبينى انا عنيا خضراء فى النهار وبالليل بتتدى على ازرق شعرى اصفر منخيرى قد النبئة وبؤى مسمسم وودانى منمنمة وبحب الرياضة وخصاتا البمباظ وفوق دة كلوا زكى ولبق
ريهام: هو دة فتى احلامى ااقابلك امتى
وسيم: يالهوى يا ادى المصيبة تقابلى مين تقابلينى انا يا نهار جميع الالوان اسود يعنى امتى وفين و الساعة كام وعلمى نفسك بعلامة علشان اعرفك
ريهام:بكرة الساعة 6 عند كشك عم جاب اللة واكون رابطة منديل احمر على راسى
وسيم:وانا كمان هاحط زهرة عداد الشمس فى جيبى
(يضع عداد الشمس فى جيبة وهى تضع المنديل على راسها ويتقابلوا)
يذهب وسيم ويلفت نظرها )
ريهام:اللة يسهلك
وسيم:اللة يسهلى هو انا شحات
ريهام: هو اتاخر لية كدة
وسيم:انا مااتاخرتش ولا حاجة انا جيت فى الميعاد بالظبط
ريهام:هو انت ااااااااا
وسيم: ايوة انا وسيم جميل لطيف اجنن مش كدة
ريهام: اصوم اصوم وافطر على بصلة (وتجرى)
وسيم:هى جريت كدة لية احسن دى حتى شكلها وحش
ريهام:وغيرة وغيرة مابتعلمش ابدا وادينى مقضياها امبارح زى بكرة زى بعدة وكل مابحاول اتغير
الكل:تفضل ريمة على عادتها القديمة
(يجلس سمير على جانب المسرح ومعة موبايل وعلى الجانب الاخر تجلس نرمين معها موبايل)
سمير:الو ازيك يا نرمين
نرمين:ازيك يا سمير
سمير:انت كنتى فين امبارح مكلمنتيش لية
نرمين:انا بعتلك مسيدج
سمير:موصليتش موصليتش وتبعتيلى لية مسيدج مش تكلمينى على طول
نرمين:معلش يا سمير متزعلش اصل انا كنت مزنوقة امبارح
سمير:واية اللى زنقك
نرمين:مافيش اصل حد قريبنا كان عندنا امبارح
سمير:حد قريبكوا مين يعنى
نرمين:دا عمى
سمير:عمك ماقولتليش لية انة جىى
نرمين:دا جية فجاة
سمير:ازاى يجى فجاة ازاى هى سيبة هى طابونة
نرمين:مالك عصبى لية كدة دا عمى يجى فى اى وقت
سمير:وجالكم امتى ولية وعلشان اية
نرمين:الساعة11
سمير:حد يزور حد فى الوقت دة
نرمين:سمير دا عمى
سمير:اى كان عمك خالك لازم الكل يخاد معاد قبل ما يجى وكمان يجى بدرى
نرمين:على فكرة يا سمير دة مشى 3 الفجر
سمير:3 الفجر ازاى الو الو دا وقت الرصيد يخلص فية(يرمى الموبايل ويذهب الى رافت صديقة)
رافت:اية اية ياعم مالك متنرفز لية كدة ماتهدى شوية
سمير:ااقولك اية يا رافت تهريج اللى بيحصل دة تهريج واستهتار كمان
رافت:اية بس اللى حصل فهمنى فى حاجة حصلت تانى بينكوا احنا ماورناش حاجة غير حكاية سمير ونرمين
سمير:تخيل عمها يجى يزورها امتى الساعة 11 يا رافت 11 بالليل يا رافت ويمشى امتى 3الفجر دة تهريج دى مؤامرة ضدى دا حتى معندوش دم دخل عليهم ايد ورا وايد قدام
رافت:سمير دا عمها مش حد غريب
سمير:انت كمان هاتقول مش غريب (يشوف نرمين ومعاها واحد بيضحكوا)شايف بتضحك ولا على بالها ولا اكنها عاملة مصيبة دى عايزة تغيظنى يا رافت نرمين تعالى هنا عايزك
نرمين:ازيك يا رافت ازيك يا سمير عامل اية
رافت:ازيك يا نرمين
سمير: تعالى هنا انا كام مرة قولتلك ماتوقفيش مع الولد دة
نرمين:ابدا كان فى مشكلة واقع فيها وبكلمنى عليها
سمير:ااةةةة ولاقتيلوا الحل لمشكلتوة
نرمين:على فكرة يا سمير هو عازمنى على عيد ميلاد اختوه بكرة الساعة 7 باى بقى يا سمير علشان ماما مستنيانى على ناصية الشارع
سمير:اااااااااةةةةةةةةة قلبى هاموت مفروس عيد ميلاد بكرة يعنى تورتة يعنى جاتوة يعنى سندوتشات لنشون وجبنة وبكرة الاربعاء يعنى صيام يا اباتا اغفر لهم لانهم لا يعلمون ماذا يفعلون
رافت:اهدا ياسمير ماتعملش فى نفسك كدة
سمير:هاموت يا رافت بتعمل فى كل العمايل دى قبل ماخطوبها امال بعد مانتجوز هاتعمل فى اية
(صوت رسالة على الموبايل)ر افت رافت خد اقرا ويغمى علية
رافت:هى كاتبة انها هاتخش السينما بعد بكرة مع صاحبيتها فيها اية يعنى يا سمير
سمير:معاد الاجتماع يا بنى ادم
رافت:يااخى دا انا لو كنت فى مكان نرمين كنت خلصت عليك
سمير:بقى كدة يا رافت
رافت:يا عم روح انتوا خنقتونى
نرمين:كانت النتيجة النهائية للى بيحصل دة انى اتخطبت لواحد تانى وهو فضل زى ماهو
الكل:وتفضل ريمة على عادتها القديمة
يعنى بتلف الدنيا بينا واحنا زى مااحنا يوم ورا يوم شهرورا شهر سنة ورا سنةواحنا لسة نايمين
رافت:دا احنا مش ناميين دا احنا ميتين
سمير:اديكو شوفتوا حياتنا شكلها ازاى
ريهام:كل واحد جوا دوامة مش عايز يطلع منها قلوبنا وبيوتنا قبور مقفولة
نرمين:ان الاوان القبور دى تتهد ونقوم من النوم مينفعش ان المسيح يقوم من الاموات واحنا لسة ميتين القيامة دى دعوى للكل لو انت لسة نايم قوم ومتكسلش زى ما السيد المسيح قام من بين الاموات الكل لازم يقوم اوعى تكسل وماتقومش انت لسة نايم وانتى لسة نايمة
النهاية